Oziq-ovqat texnologiyasi va muhandisligi xalqaro instituti O‘zbekiston Respublikasi Prezidentining 2026-yil 26-maydagi PF-98-son Farmoni, Vazirlar Mahkamasining 2017-yil 22-maydagi 304-son qarori hamda Oliy ta’lim, fan va innovatsiyalar vazirining 2026-yil 11-avgustdagi 337-son buyrug‘iga muvofiq, 2027-yil uchun O‘zbekiston Respublikasi Davlat budjeti mablag‘lari hisobidan tayanch doktorantura (PhD) va doktorantura (DSc)ga qabul e’lon qiladi.
Hujjatlar 2026-yil 15-sentabrdan 15-oktabrgacha Oliy ta’limdan keyingi ta’limni muvofiqlashtirishning Yagona elektron tizimi orqali qabul qilinadi: daraja.ilmiy.uz
2027-yil uchun institutga jami 4 ta qabul o‘rni ajratilgan bo‘lib, shundan 1 ta o‘rin doktorantura (DSc) va 3 ta o‘rin tayanch doktorantura (PhD) uchun mo‘ljallangan. Qabul 02.00.13 — Noorganik moddalar va ular asosidagi materiallar texnologiyasi ixtisosligi bo‘yicha DSc uchun 1 ta va PhD uchun 2 ta, 08.00.03 — Sanoat iqtisodiyoti ixtisosligi bo‘yicha esa PhD uchun 1 ta o‘rin asosida amalga oshiriladi.
Tayanch doktoranturaga (PhD) hujjat topshiruvchi talabgor magistr darajasiga, klinik ordinaturaga yoki tegishli mutaxassislik dasturi bo‘yicha oliy ma’lumotga ega bo‘lishi, PhD dissertatsiyasi tadqiqotiga asos bo‘la oladigan ilmiy natijalarga, jumladan kamida 1 ta ilmiy maqola va 2 ta ilmiy tezisga ega bo‘lishi hamda tanlangan ixtisoslik uchun belgilangan darajadagi xorijiy til sertifikatini taqdim etishi lozim. Doktoranturaga (DSc) talabgor esa fan nomzodi yoki PhD ilmiy darajasiga yoxud unga tenglashtirilgan xorijiy ilmiy darajaga ega bo‘lishi, ilmiy daraja olgandan keyingi muhim ilmiy yutuqlarini tasdiqlovchi, jumladan DSc dissertatsiyasi tadqiqotiga asos bo‘la oladigan kamida 3 ta ilmiy maqola va 2 ta ilmiy tezisga ega bo‘lishi hamda tegishli xorijiy til sertifikatini taqdim etishi talab etiladi.
2027-yilgi qabulning muhim yangiliklaridan biri shundaki, ilmiy kadrlar tayyorlashning ustuvor yo‘nalishlariga oid ixtisosliklarda tayanch doktorantura (PhD) va doktoranturaga (DSc) qabul kirish imtihoni o‘rniga ilmiy tadqiqot ishi taqdimoti asosida amalga oshiriladi. Bunda PhD talabgorining ilmiy muammoni asoslash, tadqiqotning maqsad va vazifalarini belgilash, obyekt va predmetni aniqlash, metodologiya, tadqiqot g‘oyasi hamda uni amalga oshirish rejasini asoslab berish qobiliyati baholanadi. DSc talabgorlarida esa avvalgi ilmiy natijalar bilan bog‘liqlik, ilmiy muammoning zamonaviy holatini tanqidiy tahlil qilish, ilmiy konsepsiya, metodologiya, kutilayotgan ilmiy yangilik hamda ilmiy-amaliy ahamiyatni asoslab berish qobiliyatiga e’tibor qaratiladi. Taqdimot mazmuni, og‘zaki taqdimot va savol-javob natijalari asosida baholanadi.
Amaldagi tartibga ko‘ra, tayanch doktoranturaga kirish imtihonlari va doktoranturaga suhbatlar 2026-yil 1–25-noyabr kunlari o‘tkaziladi. Aniq sana, vaqt va joy Oziq-ovqat texnologiyasi va muhandisligi xalqaro instituti tomonidan qo‘shimcha ravishda e’lon qilinadi. Ustuvor ixtisosliklar bo‘yicha tegishli PhD va DSc talabgorlari uchun esa kirish imtihoni o‘rniga ilmiy tadqiqot ishi taqdimoti o‘tkaziladi. Kirish imtihonlari, suhbat va taqdimot jarayonlari belgilangan tartibda video kuzatuv ostida tashkil etiladi.
2027-yildan ilmiy kadrlar tayyorlashning ustuvor yo‘nalishlariga oid ixtisosliklarga qabul qilingan doktorantlarga bazaviy stipendiyaning 1,7 baravari miqdorida oshirilgan stipendiya to‘lanishi belgilangan. Shuningdek, 2027-yil uchun tayanch doktoranturaga qabul qilingan doktorantlar birinchi o‘quv yilida sohaviy maxsus fanlar, ilmiy tadqiqot metodologiyasi va akademik yozish, statistika hamda ma’lumotlar tahlili kabi fanlar bo‘yicha o‘quv mashg‘ulotlariga jalb etiladi.
Talabgorlar hujjat topshirishdan avval tanlangan ixtisoslik bo‘yicha qabul kvotasi mavjudligini, ilmiy maqola va tezislarning mazmuni hamda rasmiy rekvizitlari amaldagi talablarga muvofiqligini, xorijiy til sertifikatining turi, darajasi, amal qilish muddati va haqiqiyligini sinchiklab tekshirishlari tavsiya etiladi. Elektron tizimga noto‘g‘ri yoki to‘liq bo‘lmagan ma’lumotlarni kiritish arizani ko‘rib chiqish jarayoniga salbiy ta’sir ko‘rsatishi mumkin.
Qabulga oid asosiy normativ-huquqiy hujjatlar bilan PF-98-son Farmon, 304-son qaror va “Oliy ta’limdan keyingi ta’lim to‘g‘risida” Nizom hamda PF-81-son Farmon orqali tanishish mumkin.
